انا هدخل الجنة حدف

=انا هدخل الجنة حدف، أنا واثق من كده، وبعدين إن ماكنتش أنا اللي هدخل الجنة مين اللي هيدخلها!!

كان في صحابي اسمه حذيفة بن اليمان، لُقب ب(صاحب سر رسول الله صلى الله عليه وسلم)!
ولُقب باللقب ده لإن سيدنا النبي صلى الله عليه وسلم أخبره بأسماء المنافقين، وماكنش حد يعرف الأسماء دي غيره هو وبس.

أما الصحابة فلما كان حد بيموت منهم وكانوا بيبقوا شاكين في نفاقه، كانوا بيراقبوا فعل سيدنا حذيفة مع الميت، عشان يتأكدوا من احساسهم ده.
-كان بيراقبوه إزاي؟
=لو سيدنا حذيفة صلى على الميت كانوا بيعرفوا إن الميت كان صالح، ولو ماصلاش عليه كانوا بيتأكدوا إن اللي مات كان منافق.
"وكان إذا مات الرجل وشكُّوا فيه، يقول عمر: انظروا، فإن صلَّى عليه حذيفة، وإلا فهو منافق منهم."

وفي يوم سيدنا عمر بن الخطاب جلس مع سيدنا حذيفة، وطلب منه يجاوبه على سؤال مهم، السؤال هو" أنشدك بالله! ألم يسمني رسول الله صَلَّى اللهُ عَلَيْهِ وَسَلَّمَ منهم؟!"

ده مين؟
سيدنا عمر بن الخطاب اللي هو من العشرة المبشرين بالجنة، اللي وافق رآيه القرآن في كذا آية، ثاني الخلفاء الراشدين،
فتح الله على يده مملكتي كسرى وقيصر، اللي قال عنه رسول الله صلى الله عليه وسلم:"لقد كان فيمن كان قبلكم من بني إسرائيل رجالٌ يكلّمون من غير أن يكونوا أنبياء، فإن يكن من أمّتي منهم أحدٌ فعمر"!

ومع كل ده كان خايف ليكون من المنافقين اللي سماهم سيدنا النبي لحذيفة، فسأل سيدنا حذيفة عشان يطمن! 💔

أومال أنا وانت وهي وهو نعمل إيه!
والغريب إننا بجحين ومقصرين ومع ذلك واثقين من دخول الجنة!
مساكين ورب الكعبة!
والله ماهندخلها بأعمالنا والله لو دخلناها هندخلها برحمة ربنا وكرمه وبس❤

أما رد سيدنا حذيفة على سؤال سيدنا عمر كان:"لا، ولا أبرئ أحدًا بعدك"❤

رضي الله عن الفاروق عمر بن الخطاب وسيدنا حذيفة بن اليمان❤🌱

والله أعلم.
#سيرة صحابة_رسول_الله🌱🌻
اللهم صل وسلم وبارك على سيدنا ونبينا محمد وعلى آله وصحبه وسلم تسليما كثيرا